Nafta është ngjitur në nivelin më të lartë në 6 vitet e fundit, në sesionin e sotëm, pasi bisedimet mes OPEC dhe aleatëve të tjerë u shtynë për një kohë të papërcaktuar, pasi grupi nuk arriti një marrëveshje mbi kuotat e prodhimit pas muajit gusht.
Nafta bruto amerikane po tregtohet në rreth 76.5 dollarëve për fuçi, ndërsa në herët gjatë sesionit u rrit pranë 77 dollarëve, niveli më i lartë që nga nëntori i vitit 2014.
Nafta Brent e Londrës po tregtohet në rreth 77.3 dollarë për fuçi, niveli më i lartë që nga fundi i vitit 2018. Bisedimet mes vendeve të OPEC+ filluan të enjten e kaluar, por deri më tani nuk është arritur një marrëveshje mbi kuotat e prodhimit. Të premten grupi votoi për të rritur prodhimin me 400 mijë fuçi në ditë çdo muaj, nga gushti deri në dhjetor.
Gjithashtu, vendet propozuan nje shtyrje të marrëveshjes për uljen e prodhimit deri në fund të vitit 2022. Por, Emiratet e Bashkuara Arabe i refuzuan këto propozime. “Për ne nuk ishte një marrëveshje e mirë”, deklaroi Ministri i Energjisë së Emirateve, Suhail Al Mazrouei.
Për shkak të marrëveshjes së OPEC+ për të ulur prodhimin, çmimet e naftës janë rritur me rreth 50% gjatë këtij viti. Por tashmë paqartësitë janë të mëdha, pasi nëse nuk do të ketë një marrëveshje, çdo vend është i lirë të prodhojë sipas dëshirës.
Bursa për datën 6 Korrik 2021 u mbyll si më poshtë:
Vlerat janë të shprehura në $/mt
Brent është shprehur në $/bbl
Produkti | Çmimi ditor ( $/mt ) | Ndryshimi ditor +/- ( $/mt ) |
BENZINA | 714.25 | – 17.00 |
DIESEL | 596.50 | – 15.75 |
BRENT | 76.115 | – 2.27 |