Policia e Elbasanit ka proceduar penalisht drejtorin e një shkolle private pasi në një video të publikuar në rrjete sociale ai shfaqet duke dhunuar nxënës dhe duke u hedhur ushqimin. Bashkia ka vendosur edhe gjobë për ndotje të mjedisit.

Mazhoranca rrëzoi në Kuvend kërkesat e PD dhe Partisë Mundësia për interpelancë me ministrin e Bujqësisë lidhur me fondet IPARD, duke argumentuar se çështja është nën hetim. Opozita e cilësoi vendimin si pengesë për kontrollin parlamentar.

Pentagoni njoftoi largimin e sekretarit të Marinës amerikane, John Phelan, pa dhënë shpjegime zyrtare, në një moment të ndjeshëm për operacionet detare të SHBA dhe përplasjet në rritje brenda kupolës së mbrojtjes.

Bashkimi Evropian po përballet me kosto më të larta të importit të lëndëve djegëse fosile pas luftës në Iran. Komisioni Evropian kërkon më shumë bashkëpunim mes shteteve anëtare dhe shtyn përpara energjitë e pastra, magazinimin dhe një rol më të madh të energjisë bërthamore.

Mbledhja e grupit parlamentar të PS solli një episod komik, ku Edi Rama u tha deputetëve se sa herë do të argëtohet hap profilin e Eduard Shalsit në Instagram. Teksa kërkoi më shumë aktivizëm në rrjetet sociale dhe në studio televizive, kryeministri kritikoi postimet e deputetëve që, sipas tij, nuk lidhen me aktualitetin, punën e qeverisë dhe krizën ku ndodhet mazhoranca. Në vend të një debati për situatën politike, vëmendja u zhvendos te “kurrikulumi” i Instagramit, ndërsa Rama prezantoi edhe këshilltaren e re, Jonida Shehu, duke e bërë të qartë se kërkesat e saj vlejnë njësoj si urdhërat e tij. Episodi e kthen krizën në skeç dhe komunikimin politik në një shfaqje ku feed-i i deputetëve bëhet më i rëndësishëm se realiteti.