Kryepeshkopi i Tiranës, Durrësit dhe gjithë Shqipërisë Anastas , ju është drejtuar Shqiptarëve ditën e sotme duke dhënë mesazhin e përvitshëm në vigjilje të ditës më të shenjtë për besimtarët ortodoksë. Ndonëse këto nuk janë kremtime të zakonshme Pashkësh, për shkak të situatës së krijuar nga pandemia e COVID-19, Kryepeshkopi Anastas i është drejtuar besimtarëve me fjalët e shpresës.
“Befasisë dhe shqetësimit që shkaktoi kjo pandemi, le t’i kundërvëmë të mospasurit frikë”, shprehet në mesazhin e tij Kryepeshkopi Anastas.
MESAZHI I KRYEPESHKOPIT
“Pashkë të mbarë, vëllezër dhe motra! Befasisë dhe shqetësimit që shkaktoi kjo pandemi, le t’i kundërvëmë të mospasurit frikë që na fal Krishti i Kryqëzuar dhe i Ngjallur. Një mospasje frikë plot me paqe dhe solidaritet. Sivjet nuk do të mund ta transmetojmë dritën e Ngjalljes, nga njëra llambadhë te tjetra. Le të transmetojmë dritën e shpresës dhe të mospasjes frikë që na fal Krishti nga njëra zemër te tjetra! Krishti u Ngjall”!