Drejtori i Institutit amerikan për Hulumtime “Scripps”, Eric Topol, i cili është edhe profesor i mjekësisë molekulare, nëpërmjet tabelave, të dhënave dhe shifrave të fundit që ka kalkuluar ka arritur në përfundimin se Kosova renditet e para për rastet e vdekjeve nga COVID-19 për 1 milion banorë, e ndjekur nga Peruja, Bolivia, Meksika dhe Panamaja.
Këto rezultate, shkencëtari i njohur Topol i ka publikuar në llogarinë e tij zyrtare në Twitter, të shoqëruara edhe me një tabelë të dhënash krahasuese me vendet e tjera në botë.
Në tabelën e publikuar nga profesori amerikan janë pasqyruar të dhënat zyrtare, deri në datën 11 gusht 2020.
Numri i rasteve të vdekjeve nga COVID në Kosovë ka qenë i lartë edhe në të dhënat e publikuara dje nga IKSHP, ku ishin gjithsejtë brenda 24 orëve 11 persona të vdekur.
Që nga fillimi i pandemisë në Kosovë kanë vdekur gjithsej 365 persona, kurse numri total i personave të infektuar është 10 mijë e 795 nga 42 mijë e 136 sa janë testuar.
Sipas të dhënave të IKSHP-së deri më 12 gusht janë shëruar 6 mijë e 411 persona, kurse mbeten aktiv edhe 4 mijë e 19.
