Avioni ka bërë ulje emergjente në aeroportin e Kapodistrias, në Korfuz për shkak të incidenteve të shkaktuara nga një pasagjer i dehur.
Mësohet se avioni “Jet2holidays” me 220 pasagjerë në bord që udhëtonin nga Turqia për në Mançester është ulur në aeroport pas orës 21:00 të mbrëmjes së sotme.
Sipas informacioneve të transmetuara nga ERT, pasagjeri turk që ishte i dehur, u ngrit nga vendi i tij dhe trokiste në dyert e kabinës, shkruan abcnews.al.
Ndërsa, pas këtij vrapimi piloti mori vendimin për uljen e avionit në aeroportin e Korfuzit. Pasagjeri i dehur u arrestua më pas nga policia në aeroport, ndërsa pasagjerët e tjerë vijuan udhëtimin normalisht.
Siç dihet, aeroportet e Greqisë i kanë të pezulluara fluturimet nga Turqia për shkak të koronavirusit. Sidoqoftë, avioni Jet-2 u pranua për shkak të thirrjes emergjente nga piloti.