Nga Anthony Zurcher, BBC
Donald Trump thotë se e ka kaluar koronavirusin dhe se edhe ju mund ta bëni këtë gjë.
Në mesazhin e tij me video nga Shtëpia e Bardhë, një Trump pa maskë i drejtohet publikut amerikan: “Mos kini frikë prej tij. Do e mposhtni atë”.
Dhe në këtë mënyrë merr formë mesazhi i presidentit për javët e fundit të fushatës së tij për t’u rizgjedhur. Ai e mori virusin sepse është një lider që del në ballë të gjërave dhe duhej ta bënte këtë.
“Kushdo që është një lider, do bënte atë që bëra unë,” tha ai.
Ishte një mesazh pothuajse mesianik në tonet e tij- një mesazh që po amplifikohet nga baza e partisë. Presidenti ka vuajtur dhe është shëruar dhe do të drejtojë kombin në tokën e premtuar përtej virusit.
Kolumnistja e New York Post, Miranda Devine, e cituar nga presidenti, tha se Trump do të rikthehej në fushatë si një ‘hero i pamposhtur’. Senatorja Kelly Loeffler postoi një video të zotit Trump duke luftuar një antagonist me kokë virusi.
Megjithatë ka një rrezik politik dhe personal për presidentin. Ai mund të përjetojë një rikthim ose vështirësi afatgjata mjekësore. Amerikanët që kanë humbur të dashurit e tyre nga sëmundja mund t’i konsiderojnë fjalët e tij si të pamenduara.
Presidenti, megjithatë, duket i vendosur për ta kthyer dobësinë e tij të fundit në forcë.