Himara u trondit mëngjesin e së shtunës, pasi biznesmeni Niko Goro mbeti i vrarë me armë zjarri, ndërsa e motra e tij u plagos në këmbë.
Rreth 1 orë pas atentatit, policia arriti të vërë në pranga autorin e dyshuar të kësaj ngjarje, i cili është shtetasi Kliti Leka, 53 vjeç, banues në Tiranë.
Mësohet se fjalët e para të 53-vjeçarit pas arrestimit kanë qenë se ai e ka vrarë Goron për shkak të një borxhi. Akoma mbetet e paqartë nëse bëhet fjalë për borxh për instalime elektrike apo për prona. Kjo pasi 53-vjeçari është në nip në Himarë dhe pretendon se ka tokë të trashëguar.
Policia raportoi se ka gjetur edhe një tjetër armë zjarri pas ngjarjes, një pistoletë.
Himarë/Informacion shtesë
Në lidhje me informacionin e dhënë për kapjen e autorit të vrasjes në Himarë si dhe për gjetjen e armës kallashnikov, ju informojmë se:
Shërbimet e Policisë gjatë kontrollit të automjetit kanë gjetur dhe një tjetër armë zjarri të tipit pistoletë, e cila është sekuestruar në cilësinë e provës materiale.
Grupi hetimor nën drejtimin e Prokurorisë po punon për sqarimin e rrethanave të ngjarjes dhe përcaktimin se me cilën prej armëve të sekuestruara, autori ka kryer krimin.
