Presidentja e Komisionit Evropian Ursula von der Leyen ka njoftuar futjen e një emërtimi të ri në hartën epidemiologjike të Evropës.
Sipas saj, do të futen zona të kuqe të errëta nga të cilat udhëtarët duhet të testohen para se të nisen dhe të shkojnë në karantinë pas mbërritjes në destinacion.
“E kuqja e errët do të tregonte zonat ku qarkullimi i virusit është në një nivel jashtëzakonisht të lartë,” tha von der Leyen pas takimit të nivelit të lartë të udhëheqësve të BE, i cili ishte i dedikuar për koordinimin e masave për të luftuar pandeminë e koronavirusit.
Shënimi i zonave epidemiologjike nuk varet nga kufijtë kombëtarë. Von der Leyen përmend si shembull rastin që në një shtet anëtar, kufijtë janë të mbyllur dhe të hapur në një zonë fqinje me të njëjtën situatë epidemiologjike.
“Në atë rast, të gjithë nga vendi i parë do të dilnin për të bërë pazar në vendin e dytë dhe kështu do të kontribuonin në përhapjen e virusit,” thotë Von der Leyen.
Presidenti i Këshillit Evropian Charles Michel tha se udhëheqësit e vendeve anëtare pajtohen se është e nevojshme të merren parasysh mundësitë e kufizimit të udhëtimit, nëse udhëtimet nuk janë të nevojshme.
“Ne jemi të bindur se, kur bëhet fjalë për udhëtime që nuk janë të nevojshme, duhet të merren parasysh kufizimet”, tha Michel.
Por ai theksoi se kufijtë duhet të qëndrojnë të hapur që tregu i vetëm të funksionojë si duhet.
Ata paralajmëruan për rrezikun e mutacionit të virusit, shtame të reja që janë shumë më ngjitëse. Prandaj, ka marrëveshje për të rritur renditjen e gjenomit COVID-19 në mënyrë që të zbulohen mutacionet e virusit në kohën e duhur.
Krerët e BE diskutuan gjithashtu çertifikatat e vaksinimit. Michel tha se ka marrëveshje për çertifikatat e standardizuara për qëllime mjekësore, por që është shumë herët të flitet për qëllimin e tyre të dytë.
Kryeministri grek Kiriakos Mitsotakis sugjeroi që këto certifikata të shërbejnë si indicie për të ringjallur turizmin.
Michel thekson se është shumë herët për këtë derisa të vaksinohen një numër mjaft i madh njerëzish, sepse përndryshe do të kishte diskriminim ndaj njerëzve që as nuk kishin mundësi ta bënin këtë. /tesheshi/