Tom Doshi ka pasur një reagim të ndryshëm nga miku i tij Edi Rama lidhur me akuzat e ambasadores amerikane për mospërfshirjen e deputetit shkodran në zgjedhje pasi votuesit shqiptarë meritojnë më shumë. Ndërsa Doshi i është përgjigjur me një shpjegim të zgjatur fjalëve të Yuri Kim, po sot kryeministri ka mbylluar gojën në konferencën e sotme për shtyp.
Rama është pyetur drejtpërdrejt për këtë, dhe për faktin se ai është në aleancë me PSD, partinë që drejtohet nga Doshi.
Por kryeministri është shmangur, nuk është përgjigjur. Dhe për më tepër, ka theksuar se nuk do të përgjigjet më sa herë të pyetet për ambasadoren amerikane, pasi ka vënë re se mediat spekullojnë dhe krijojnë një ngjarje që nuk ekziston, sipas tij.
Por ndryshe nga miku i tij kryeministër Doshi është treguar më i guximshëm.
“Fëmijët e mi janë nënshtetas australianë s’kanë nevojë as për vizë amerikane, as kanë qenë asnjëherë në Amerikë, as gruaja ime as fëmijët e mi. E gjithë kjo punë është a e merr vizën apo se merr.
E dyta kam aplikuar në ambasadë në kohën që kam qenë në hetim, nuk më është thënë që të refuzohet. Merr një letër nga prokuroria më kanë thënë, dihej që isha në hetim. Nuk më është refuzuar me shkrim, apo me vulë.
Unë jam opozitar, s’kam firmosur ndonjëherë në shtet, 13 vjet që kam deputet s’kam qenë ndonjëherë në pushtet. Me bo korrupsion duhesh me qenë ministër e kryeministër, s’jam marrë asnjëherë me tendera, jam taksapaguesi më i madh në Shqipëri me kompanitë që kam.
Kjo është puna e atyre që janë marrë me këtë çështje, unë shpirtërisht jam i pastër, kam pasur një shtet kundër, jam arrestuar në mënyrë të paligjshme, as e kam ndërmend të merrem me këtë punë, por pasi të më bëhet zyrtare kam të drejtën time të kërkoj “pse”. – u tha ai gazetarëve.