Zbardhet ekspertiza paraprake e zjarrit të rënë pasditen e së mërkurës në magazinën e një qendre tregtare në kryeqytet ku humbi jetën 32-vjeçari Arjan Sala.
Sipas të dhënave që ka marrë grupi hetimor dyshohet se flakët u shkaktuan nga një masë në kabullin e neonëve. Shkëndijat kanë rënë në mbi kutitë e mbushura me rroba sintetike dhe këpucë duke u aktivizuar menjëherë.
Punëtorët e magazinës kanë rrëfyer se rreth orës 15:00 ata ishin duke shkarkuar mallin nga një kamion kur ka rënë alarmi. Në magazinë janë futur rojet e sigurisë, mes të cilëve edhe Arjan Sala, të cilët kanë nxjerrë të gjithë punëtorët jashtë.
Sipas të njëjtave burime, i riu ka marrë një bombol dhe ka tentuar të fikë zjarrin në vatrën e tij. Flakët janë përhapur me shpejtësi dhe ai nuk ka mundur të dalë.
Në ekspertizën paraprake thuhet se 32-vjeçari ka tentuar të dalë nga një derë e emergjencës, por besohet se është rrëzuar për shkak të errësirës dhe tymit të dendur që kishte pushtuar magazinën. Më pas flakët janë riaktivizuar dhe temperatura në brendësi arriti mbi 900 gradë.
Burimet thanë se hetimet janë përqendruar nëse janë zbatuar të gjitha masat e përcaktuara në rast të rënies së zjarrit si dhe nëse godina i plotësonte të gjitha detyrimet për të tilla raste.
Arjan Sala u gjet pas 3 ditësh pranë derës së emergjencës dhe u identifikua nga familjarët e tij. Qeveria ka premtuar se do ta shpallë atë “Dëshmor të Atdheut”.