Me ngritjen e BKH, pritet që një vëmendje e madhe të fokusohet te gjetja e parave të korrupsionit jashtë vendit. Në të vërtetë pjesa më e madhe e parave të korrupsionit kanë shkuar në Maltë dhe Zvicër, ndërsa një pjesë në Singapor dhe ishujt Kajman. Kjo është bërë publike nga shumë raporte ndërkombëtare, pasi para vitit 2013 pjesa më e madhe e parave shkonin në bankat e Qipros. Por në 2013 ishulli u përfshi nga kriza e rëndë financiare, që solli bllokimin e bankave. Kriza trembi shumë zyrtarë, jo vetëm shqiptarë, por dhe të tjerë që tentuan të tërheqin milionat, por e patën të pamundur t’i marrin të gjitha. Një vendim i Bashkimit Europian për të mos siguruar depozitat në bankat e Qipros, tronditi në atë kohë zyrtarët shqiptarë, të cilët kishin fshehur paratë e korrupsionit në ato banka. Ministrat e Financave të Eurozonës deklaruan në atë kohë se nuk mund të garantonin asnjë depozitë mbi 100 mijë euro në Qipro. Në atë kohë u raportua se pati tentativa për të tërhequr paratë, ku një pjesë u morën, ndërsa një pjesë tjetër u humb në ato banka. Për këtë arsye shumë para kanë shkuar në bankat e Maltës, pasi edhe ky vend cilësohet si një parajsë fiskale. Gjatë kësaj periudhe nuk munguan dhe akuzat në Parlamentin shqiptar, pasi ishte deputeti Taulant Balla, ai që akuzoi një ish-ministër të PD se ka fshehur 1.2 milionë euro në Qipro. Në atë kohë raportohej madje se kishte raste që paratë shkonin dhe me helikopter. Por ajo që dëshmon qartë se shumë para kanë shkuar në bankat e huaja, sidomos në Maltë apo Zvicër janë deklaratat e pasurive të politikanëve shqiptarë. Pas humbjes së pushtetit të gjithë ish-ministrat deklaruan shumë herë më pak llogari bankare se kur ishin në pushtet. Kjo tregon se ata i zbrazën llogaritë dhe paratë kanë dalë jashtë vendit. Faktin për fshehjen e parave në Maltë e konfirmojnë dhe vetë autoritetet vendase. Inteligjenca Financiare malteze, në raportin për fshehjen dhe pastrimin e parave tregon se shumë zyrtarë të lartë, kompani dhe individë nga vend të ndryshme, përfshirë dhe Ballkanin dërgojnë aty para. Sipas statistikave të publikuara prej saj, policia vendase në të gjitha rastet e dyshimta për fshehje apo pastrim parash, të huajt përdorin llogari të shumta bankare, por dhe kompani vendase për të kamufluar pasuritë e tyre. Policia malteze në shumë rate ka zbuluar transferta të dyshimta bankare në mënyrë elektronike.