Gazetari Artan Hoxha ka deklaruar se në zona rezidenciale në Tiranë po kultivohet kanabis. Në studion e Radar Informativ me Jonida Shehun, Hoxha tha se vila të shtrenjta janë kthyer në “shtëpi bari”.
Sipas gazetarit bëhet fjalë për zona ku jetojnë politikanë dhe personazhe të njohur, ndërkohë që grupet kriminale po i përdorin këto banesa sepse nuk ka kontroll nga policia.
Gjithashtu, Hoxha theksoi se “lulëzimi” i kultivimit të kanabisit në ambiente të mbyllura në vendin tonë në këtë periudhë vjen pasi u mor përvoja nga Anglia.
“Pse u shumëfishuan ta i shtëpitë e barit. Sepse shumë shqiptarë që u morën me kultivimin kanabisit në Angli e mësuan atje dhe e sollëm këtu. Ne nuk dinim ta bënim. Ata erdhën që andej kanë sjellë teknikën, pajisjet. Kam parë raste në 2013, 2014 por tani e kanë sofistikuar. Kanë infrastrukturën dhe mjetet duhura. Nëse OSHEE nuk bashkëpunon me policinë, se kërkon shumë energji…ka informacion që në zona rezidenciale ku edhe unë nuk hyj dot, komplekse ku rrinë VIP-a, ku ka vila nga 500 mijë euro, janë marrë vila dhe është mbjellë aty sepse policia aty nuk hyn dot.
Nuk të shkon mendja se ai mund të marrë një banesë me qira me 200 euro në muaj dhe ta kthejë në shtëpi kanabisi. Aktualisht në Tiranë në zona rezidenciale po kultivohet kanabis në zona të mbyllura. Aty i shpëton kontrollit. U bëj thirrje banorëve të këtyre zonave nëse ndjejnë vapë duhet të gjejnë vigjilentë se aty duhet të jetë ndonjë shtëpi bari me llampa. Në këto zona ku jetojnë, politikanë, Vip-a po përdoren banesa nga grupet kriminale për të kultivuar kanabis. Duhet të ketë një plan kombëtar për ta goditur,” u shpreh ai.