Biznesit të Lefter Kokës në Durrës i është vendosur tritol me dron. Ngjarja ka ndodhur ditën e martë. Uniformat blu bëjnë me dije se nga shpërthimi i lëndës eksplozive janë shkaktuar dëme të vogla materiale.
Policia njofton se kanë kapur autorin e dyshuar, G. M., 44 vjeç, banues në Shijak. Sakaq, është arrestuar B. Z., 34 vjeç, banues në Shetaj, Durrës, menaxher i lokalit në pronësi të autorit G. M., pasi nga kontrolli i ushtruar në automjetin e tij, shërbimet e Policisë gjetën dhe sekuestruan në cilësinë e provës materiale një armë zjarri pistoletë, me një karikator me 7 fishekë luftarakë.
Njoftimi i Policisë se Durresit:
Vendosi lëndë eksplozive në një objekt biznesi, identifikohet dhe arrestohet në flagrancë nga Policia.
Vihet në pranga edhe menaxheri i lokalit në pronësi të autorit të dyshuar, pasi nga kontrolli në mjetin e tij Policia gjeti dhe sekuestroi një armë zjarri pistoletë.
Sekuestrohen një armë zjarri pistoletë dhe municion luftarak.
Shërbimet e Komisariatit të Policisë Durrës, menjëherë pas njoftimit të marrë për shpërthimin e një sasie të vogël lënde eksplozive të hedhur mbi tarracën e një godine trekatëshe, objekt biznesi, në pronësi të shtetasit J. D., në lagjen nr. 14 Durrës, kanë organizuar punën dhe falë veprimeve të shpejta hetimore dhe profesionale, bënë të mundur identifikimin, kapjen dhe arrestimin e autorit të dyshuar, shtetasit: G. M., 44 vjeç, banues në Shijak.
Nga shpërthimi i lëndës eksplozive janë shkaktuar dëme të vogla materiale.
Në vijimësi të veprimeve hetimore u arrestua në flagrancë dhe shtetasi B. Z., 34 vjeç, banues në Shetaj, Durrës, menaxher i lokalit në pronësi të shtetasit G. M., pasi nga kontrolli i ushtruar në automjetin e tij, shërbimet e Policisë gjetën dhe sekuestruan në cilësinë e provës materiale një armë zjarri pistoletë, me një karikator me 7 fishekë luftarakë.
Gjithashtu në vijim të veprimeve u procedua penalisht edhe vëllai i autorit të dyshuar të ngjarjes, shtetasi A. M., 46 vjeç, banues në Shijak, pasi nga kontrolli i ushtruar në banesën e tij në Shijak iu gjet një sasi vere me logon e një subjekti tjetër, veprime këto që bien ndesh me vendimin e gjykatës.
Në përfundim të veprimeve procedurale, materialet iu referuan Prokurorisë pranë Gjykatës së Shkallës së Parë Durrës, në ngarkim të shtetasit G. M., për veprat penale ‘Shkatërrimi i pronës me eksploziv’, ‘Kanosja’, ‘Mbajtja pa leje e armëve dhe municionit’; në ngarkim të shtetasit B. Z., për veprën penale ‘Mbajtja pa leje e armëve dhe municionit ‘dhe në ngarkim të shtetasit A. M. për veprat penale ‘Shkelja e të drejtave të pronësisë industriale’ dhe ‘Veprime në kundërshtim me vendimin e gjykatës’.