Kuqezinjtë e Shqipërisë regjistruan një tjetër humbje në fushatën e Nations League, këtë herë përballë Çekisë, në një ndeshje që u zhvillua në “Epet Arena” të Pragës. Me këtë rezultat, shanset për të zënë vendin e parë në grup duken gjithnjë e më të vështira, pasi kjo ishte humbja e dytë radhazi për ekipin e drejtuar nga trajneri Sylvinho.
Ndeshja nisi në mënyrë katastrofike për Shqipërinë, që u kap në befasi që në minutat e para. Chory, sulmuesi çek, arriti të shënojë që në minutën e 3-të, duke përfituar nga një mbrojtje jo e koordinuar mirë e kuqezinjve. Hysaj lejoi një krosim të lehtë nga krahu i djathtë, ndërsa Ismajli u kap i papërgatitur nga topi i harkuar drejt zonës, çka i dha Chory-t hapësirën e nevojshme për të goditur dhe mposhtur portierin Strakosha, i cili nuk kishte asnjë mundësi reagimi.
Pas golit, Shqipëria u mundua të rikthehej në lojë, por vuajti për të gjetur ritmin. Me kalimin e minutave, kuqezinjtë filluan të shfaqnin më shumë kurajë dhe tentuan të shtyjnë lojën përpara. Disa herë iu afruan zonës së rrezikut, por mungoi saktësia në veprimet e fundit. Daku dhe Laçi patën mundësi të krijonin raste të rrezikshme, por gabuan në ekzekutim; Daku u tregua tejet optimist për aftësitë e tij teknike, ndërsa Laçi humbi një pasim vendimtar në fazën sulmuese. Vetëm Bajrami arriti të rrezikojë realisht portën çeke, duke tentuar të përsëriste golin e mrekullueshëm të realizuar në Pragë një vit më parë, por pa sukses.
Çekia, nga ana e saj, e dominoi zotërimin e topit me 58%, por nuk arriti të godasë në kuadratin e portës së Strakoshës për pjesën e mbetur të pjesës së parë. Loja e tyre ishte më e qetë, duke menaxhuar avantazhin dhe duke pritur rastet e duhura për të goditur.
Mundësia më e mirë për Shqipërinë erdhi në minutën e 52-të, kur Asani humbi një shans të artë për të barazuar. I njohur për goditjet e tij të sakta, këtë herë Asani u tregua i pafat, duke e dërguar topin jashtë portës në një situatë ku pritej shumë më tepër prej tij. Ky gabim i kushtoi shtrenjtë Shqipërisë, pasi vetëm dhjetë minuta më vonë, Chory shënoi sërish, këtë herë duke përfituar nga shtatlartësia e tij në qendër të zonës shqiptare. Ky gol i dytë e mbylli praktikisht ndeshjen dhe shoi shpresat e kuqezinjve për të marrë pikë nga kjo përballje.
Me këtë rezultat, Shqipëria ndodhet në një pozicion të vështirë në grup dhe shanset për të zënë vendin e parë janë zbehur ndjeshëm. Tashmë, ekipi duhet të analizojë performancën e dobët në këtë ndeshje dhe të përgatitet për sfidat e ardhshme, në përpjekje për të rikuperuar terren në Nations League.