Përplasja mes opozitës dhe qeverisë për thirrjen e biznesmenes Vilma Nushi si dëshmitare në komisionin hetimor për koncesionet në shëndetësi ka ndezur debatin politik dhe publik në Shqipëri. Opozita ka kërkuar me këmbëngulje që Nushi, e cila përfitoi nga koncesioni i shumëpërfolur i Check Up-it nëpërmjet kompanisë së saj “3P Life Logistic,” të dëshmojë për përdorimin e fondeve publike. Ndërkohë, socialistët janë përpjekur ta mbrojnë atë, duke ndaluar përmendjen e plotë të emrit të saj dhe duke vendosur veto për dëshminë e saj.
Historia e koncesionit të Check Up-it daton që në vitin 2015, kur qeveria e drejtuar nga kryeministri Edi Rama, nën kujdesin e ministrit të atëhershëm të Shëndetësisë, Ilir Beqaj, nënshkroi një kontratë prej 120 milionë euro për ofrimin e shërbimit të kontrollit shëndetësor falas për shtetasit. “3P Life Logistic,” një kompani e sapo krijuar dhe e lidhur me Nushin përmes firmës së saj më të madhe, “Marketing & Distribution,” fitoi këtë kontratë të majme, ndonëse nuk kishte një histori të mëparshme suksesi në sektorin e shëndetësisë. Procedura e tenderimit ngjalli dyshime të forta për favorizim, pasi kompanitë konkurruese u përjashtuan për arsye dokumentacioni, ndërsa “3P Life Logistic” u shpall fituese, pavarësisht se kishte ofruar çmimin më të lartë për çdo pacient të diagnostifikuar.
Shumë zëra kritikë besojnë se kompania e Nushit ishte përzgjedhur që nga fillimi për të fituar kontratën, pasi licenca për laborator kimik dhe biokimik u mor vetëm dy ditë përpara përfundimit të afatit për dorëzimin e dokumentacionit të tenderit. Fitimi i kontratës, i shoqëruar me pagesa të sigurta dhe me norma fitimi që tejkalonin investimet fillestare, e bëri “3P Life Logistic” një nga historitë më të suksesshme financiare në sektorin privat. Në vetëm nëntë muajt e parë, kompania jo vetëm që rikuperoi investimin, por realizoi fitime të mëdha. Nëse në fillim u investuan 337 milionë lekë për ngritjen e laboratorëve, për periudhën mars-dhjetor 2015 kompania përfitoi plot 554 milionë lekë nga shteti.
Por kjo marrëveshje nuk mbeti pa dyshime të thella. Në bazë të kontratës, kompania do të duhej të kryente analiza për rreth 475,000 pacientë në vit, dhe paguhej për këtë shifër të plotë, pavarësisht se në vitin e parë u realizuan rreth 200,000 analiza më pak. Në vend që qeveria të ndërhynte për të korrigjuar pagesat e larta, ajo zgjodhi të ndryshonte fashën e moshës së përfituesve të shërbimit, duke e zgjatur atë nga mosha 35 deri në 70 vjeç. Kjo rritje e numrit të përfituesve i mundësoi Vilma Nushit të vijonte të përfitonte nga pagesat e shtetit, ndërkohë që çështjet e transparencës u lënë në hije.
Opozita kërkoi me këmbëngulje praninë e saj në komision, duke e cilësuar atë si financuese të fushatave të Partisë Socialiste, dhe thekson se përmes këtij koncesioni Nushi ka përfituar mbi 90% të fondeve shtetërore të destinuara për Check Up-in. Sipas tyre, mbrojtja e fortë që socialistët i kanë bërë asaj në komision, për të mos dëshmuar dhe për të mos iu referuar drejtpërdrejt në publik, tregon lidhjet e saj të ngushta me qeverinë dhe rëndësinë e kontributit të saj financiar për partinë në pushtet.
Ndërkohë, një raport i publikuar nga organizata “Together for Life” tregon se problemi i pagesave për analiza të pakryera ka vazhduar ndër vite. Vetëm në vitin 2022, kompania koncesionare u pagua për 20,182 pacientë të cilët nuk e kryen kontrollin. Ky raport ka nxitur një debat të fortë publik mbi transparencën dhe drejtësinë e kësaj kontrate, si dhe për përgjegjësitë e qeverisë në menaxhimin e fondeve publike.
Ndërkohë që kontrata 10-vjeçare është drejt fundit, skandali i Check Up-it mbetet një ndër episodet më të bujshme të shpenzimeve në sektorin e shëndetësisë në Shqipëri, me mbi 120 milionë euro të paguara për shërbime që sipas kritikëve nuk janë realizuar tërësisht. Kërkesa e vazhdueshme e opozitës për thirrjen e Nushit në komision është shenjë e vendosmërisë së saj për të zbardhur të vërtetën e kësaj marrëveshjeje, ndërsa mbrojtja e saj e fortë nga socialistët, në të njëjtin nivel me kryeministrin Rama, ka ngritur pyetje të reja mbi lidhjet mes biznesit dhe politikës në Shqipëri.