Sufiçiti i buxhetit të shtetit shqiptar ka arritur në mbi 720 milionë euro deri në fund të muajit tetor 2024, duke hapur një debat të madh mbi menaxhimin financiar të qeverisë Rama. Sipas të dhënave zyrtare nga Ministria e Financave, të ardhurat totale për 10-mujorin janë 589 miliardë lekë, ndërsa shpenzimet publike arritën në 517 miliardë lekë.
Kjo situatë ka nxitur kritika për qeverinë, e cila nuk ka arritur të zbatojë planin e shpenzimeve të programuara. Ky akumulim i tepruar i fondeve ngre shqetësime për ekonominë, pasi mungesa e qarkullimit të parave në treg ka ndikuar në forcimin e lekut kundrejt euros, duke goditur eksportet dhe sektorin privat.
Për të respektuar planin e buxhetit, qeveria duhet të shpenzojë mbi 1.3 miliardë euro në dy muajt e fundit të vitit. Premtimi për një fond prej 100 milionë euro për bonusin e pensionistëve është një masë e mirëpritur, por pjesa tjetër pritet të ndahet në mënyrë të shpejtë dhe jo gjithmonë transparente përmes akteve normative në ditët e fundit të vitit.
Ekspertët kritikojnë këtë mënyrë menaxhimi, duke e cilësuar si një traditë të përqendrimit të shpenzimeve buxhetore në fund të vitit, e cila përforcon dyshimet për cilësinë e administrimit të financave publike. Mungesa e investimeve të planifikuara jo vetëm që dëmton rritjen ekonomike, por thellon gjithashtu pasiguritë në treg.
Në një kohë kur shqiptarët përballen me vështirësi ekonomike, sufiçiti rekord paraqet një ironi të hidhur, duke treguar një hendek të thellë midis planeve të qeverisë dhe nevojave reale të qytetarëve. A është kjo një simptomë e keqmenaxhimit apo një strategji për të ruajtur fuqinë politike? Koha do të tregojë.