Në orët e para të mëngjesit, policia kreu kontrolle në banesat e ish-zv.kryeministrit të Maqedonisë së Veriut, Artan Grubi, dhe ish-drejtorit të Lotarisë së Maqedonisë, Përparim Bajrami.
Hetimi për krime në Lotarinë e Maqedonisë
Sipas burimeve nga Ministria e Punëve të Brendshme, bastisjet u zhvilluan në kuadër të hetimeve për dyshime për korrupsion dhe aktivitete kriminale në Lotarinë e Maqedonisë.
Artan Grubi nuk u gjet në banesën e tij, pasi mësohet se ndodhet në Kosovë për një vizitë private. Ndërkohë, Përparim Bajrami gjithashtu nuk ishte prezent në shtëpinë e tij, dhe sipas familjarëve, ai ndodhet jashtë vendit prej disa muajsh.
Gjetjet e bastisjeve
Gjatë kontrollit në banesën e Përparim Bajramit, policia zbuloi një shumë prej 50 mijë frangash zvicerane, e cila u sekuestrua si provë materiale.
Hetimet vazhdojnë në bashkëpunim me institucionet përkatëse, ndërsa pritet të sqarohet natyra dhe burimi i këtyre fondeve, si dhe lidhjet e mundshme me dyshimet për krime financiare në Lotarinë e Maqedonisë.