Një aksident i trefishtë ka ndodhur këtë mbrëmje te rrethrrotullimi i Saukut në Tiranë, duke shkaktuar kaos në trafik dhe dy të plagosur.
Sipas informacioneve zyrtare, Vanion Cinari, mjek me profesion, është njëri nga të plagosurit dhe ndodhet në gjendje të rëndë shëndetësore. Cinari po trajtohet aktualisht nën kujdesin intensiv të mjekëve në spitalin e Traumës. Ndërkohë, një tjetër e plagosur është Alba Shehaj, 32 vjeç, e cila fatmirësisht ndodhet jashtë rrezikut për jetën.
Si pasojë e përplasjes së mjeteve, zona është përfshirë në kaos të plotë trafiku. Ekspertët e policisë ndodhen në vendin e ngjarjes për të mbledhur prova dhe për të sqaruar shkaqet që çuan në këtë aksident të rëndë. Po ashtu, po punohet për lirimin e rrugës dhe normalizimin e qarkullimit të automjeteve.
Ngjarja ka shkaktuar shqetësim të madh tek drejtuesit e mjeteve dhe banorët e zonës, ndërsa priten detaje të mëtejshme nga hetimet e policisë.