Pesë muaj pas emërimit të tij si zëvendës ndihmës sekretar për Ballkanin Perëndimor, Alexandër Kasanof realizoi vizitën e tij të parë në Shqipëri. Vizita e zyrtarit të lartë amerikan përkon me 5-vjetorin e krijimit të SPAK, ngjarje kjo e cila do të shoqërohet nga aktivitete zyrtare në kryeqytet.
Kasanof do të mbajë një fjalim në aktivitetin kryesor si përfaqësues i SHBA-së, vend i cili bashkë me Bashkimin Evropian është ndër mbështetësit kryesorë të reformës në drejtësi në Shqipëri. Gjatë mbërritjes së tij në Tiranë, Kasanof zhvilloi një takim kokë më kokë me ambasadorin e delegacionit të BE-së, Silvio Gonzato, ku diskutimet u përqendruan mbi ecurinë e reformës dhe sfidat që ajo vazhdon të hasë.
Ambasadori Gonzato, në një deklaratë të fundit, theksoi rëndësinë e SPAK si një institucion që po vepron i pavarur dhe pa ndikime politike. Ai vlerësoi gjithashtu punën e kryetarit aktual të SPAK, Arben Dumani, si një profesionist me integritet të lartë.
Një institucion mes sfidave dhe presionit politik
SPAK ka shkaktuar jo pak polemika gjatë viteve të tij të funksionimit, veçanërisht për ndjekjen penale të zyrtarëve të lartë dhe ish-zyrtarëve të përfshirë në korrupsion dhe abuzim me detyrën. Këto veprime kanë ndarë opinionin publik dhe kanë shkaktuar reagime të ashpra në radhët e politikës shqiptare.
Ndërkohë, një komision i posaçëm parlamentar për antikorrupsion dhe mirëqeverisje ka nisur punën për të çuar përpara reformat, por ky proces është shoqëruar me skepticizëm nga donatorët ndërkombëtarë për shkak të mungesës së ekspertëve nga institucionet kyçe të drejtësisë.
Kasanof dhe përfaqësues të tjerë ndërkombëtarë pritet të monitorojnë nga afër punën e SPAK dhe institucionet e tjera që lidhen me zbatimin e reformës në drejtësi, duke nënvizuar përkushtimin e SHBA-së dhe BE-së për një sistem drejtësie të drejtë dhe të pavarur në Shqipëri.