Ndërsa Europa po avancon drejt burimeve të rinovueshme dhe energjisë së gjelbër, Shqipëria, nën drejtimin e kryeministrit Edi Rama dhe oligarku i të gjitha palëve politike Bashkim Ulaj, po bën hapa mbrapa me miratimin e një TEC-i që do të ndotë rëndë mjedisin dhe shëndetin e banorëve. Vendimi për ndërtimin e TEC-it në Roskovec është një shembull flagrant i shpërfilljes ndaj standardeve mjedisore dhe përkushtimit ndaj interesave private.
Shfrytëzimi i Shqipërisë si “gazermë e tymrave”
Ndryshe nga vendet e BE-së, të cilat po investojnë fuqishëm në energji të rinovueshme për të reduktuar emetimet e karbonit, Shqipëria po kthehet në një terren për projekte të dëmshme për mjedisin. TEC-i i Roskovecit, me pronësi 70% nga dy ortakë grekë dhe 30% nga Bashkim Ulaj, do të prodhojë 90% të energjisë për eksport në Greqi, ndërsa për banorët do të mbetet vetëm ndotja.
Kosto mjedisore dhe shëndetësore e papërballueshme
Vendndodhja e TEC-it brenda një zone bujqësore dhe të banuar është një vendim që sfidon çdo logjikë mjedisore. Emisionet toksike nga ky TEC pritet të kenë ndikim të rëndë në shëndetin e banorëve dhe mjedisin përreth. Për më tepër, zona ishte premtuar për zhvillim bujqësor dhe turistik, duke u krahasuar me Toskanën e Italisë, por tani do të kthehet në një pikë të zezë ndotjeje.
Pazari paraprak dhe mungesa e transparencës
Dokumentet zbulojnë se leja për ndërtimin e TEC-it ishte ishte bërë gati që dy vite përpara vendimit zyrtar të qeverisë më 18 dhjetor 2024. Kompania “Fier Thermoelectric Sh.a” u krijua me specifikime të sakta të paracaktuara për të përfituar nga ky projekt.
Kundër interesave të qytetarëve
Ky projekt jo vetëm që cenon mjedisin dhe shëndetin publik, por është një dëshmi e qartë e mënyrës si qeveria e përdor Shqipërinë për interesa private dhe klienteliste. Ndërsa TEC-i u refuzua për ndërtim në Greqi nga BE, ai u miratua në Shqipëri, duke treguar se vendi po trajtohet si një “magazinë ndotjeje” për projektet që vendet e zhvilluara nuk i pranojnë.
Banorët duhet të kundërshtojnë
Ky TEC, që do të helmojë zonën deri në vitin 2074, është një kërcënim i madh për mjedisin dhe banorët e Roskovecit. Në një kohë kur bota po kalon drejt energjisë së pastër, Shqipëria nuk mund të mbetet pas duke sakrifikuar jetën dhe të ardhmen e qytetarëve për interesa të ngushta. Vetëm një reagim i fuqishëm i komunitetit mund të ndalojë këtë projekt të rrezikshëm.