Në darkën tradicionale të fundvitit me trupin diplomatik, e organizuar nga kryeministri Edi Rama, karrigia e ambasadorit rus mbeti bosh. Kryeministri Rama komentoi mungesën si një zgjedhje të rëndë nga ana e Federatës Ruse, duke deklaruar se Rusia ka dalë nga radhët e paqedashësve përmes agresionit të saj ushtarak kundër Ukrainës.
Në fjalën e tij, Rama theksoi vuajtjet e popullit ukrainas dhe bëri thirrje për një paqe të drejtë në Ukrainë:
“Ukraina dhe populli i saj trim meritojnë admirimin, solidaritetin dhe mbështetjen tonë të patundur. Sjelltë viti i ri një paqe të drejtë për ta.”
Fokusi edhe tek Lindja e Mesme
Rama u ndal edhe tek konflikti izraelito-palestinez, duke shpresuar për një zgjidhje paqësore. Ai theksoi rëndësinë e zgjidhjes me dy shtete, duke shtuar se paqja është e pamundur për sa kohë Hamasi mbetet pjesë e situatës:
“Të presësh paqe nën influencën e Hamasit është po aq naive sa të përpiqeshe të ndërtoje Europën e pas Luftës së Dytë Botërore përkrah SS-ve.”
Mungesa e ambasadorit rus në këtë darkë reflekton tensionet diplomatike dhe distancimin e qeverisë shqiptare nga politika ruse, ndërsa vendi vazhdon të mbështesë fuqishëm Ukrainën dhe demokracitë perëndimore.