Jeff Bezos, themeluesi i Amazon dhe një prej njerëzve më të pasur në botë, pritet të martohet këtë javë me partneren e tij, Lauren Sánchez. Dasma, e mbuluar nga një fshehtësi e madhe, pritet të mbahet në Aspen, Kolorado, pas Krishtlindjeve.
Sipas burimeve, çifti ka rezervuar një restorant luksoz për datat 26 dhe 27 dhjetor, ku do të organizohen darka tematike dhe një ceremoni madhështore. Lista e të ftuarve përfshin emra të shquar si Leonardo DiCaprio, Bill Gates dhe Mbretëresha Rania e Jordanisë.
Pavarësisht përpjekjeve për të mbajtur gjithçka private, thashethemet sugjerojnë se dasma mund të arrijë një kosto deri në 600 milionë dollarë, duke përfshirë prenotimin e hoteleve me 5 yje dhe vilave private në Aspen.
Bezos i propozoi Sánchez-it në maj 2023 në superjahtin e tij, dhe që atëherë kanë qenë në qendër të vëmendjes mediatike. Megjithatë, mbeten dyshime mbi datën dhe vendin e saktë të ceremonisë.
Kjo dasmë pritet të jetë një nga ngjarjet më të bujshme të vitit, duke tërhequr vëmendjen e gjithë botës. Surprizat nuk përjashtohen, dhe mund të ketë zhvillime të reja në ditët në vijim.