Presidenti i zgjedhur i SHBA-së, Donald Trump, do të bëjë betimin për mandatin e tij të ri të hënën më 20 janar, brenda Kapitolit, si masë kundër temperaturave ekstremisht të ulëta të parashikuara për Washingtonin.
Trump, përmes një postimi në platformën e tij “Truth Social”, konfirmoi se vendimi për betimin në ambiente të mbyllura u mor për të shmangur rrezikun e pasojave për pjesëmarrësit.
Shërbimi Kombëtar i Motit ka paralajmëruar temperatura rekord të ulëta prej -6 gradë Celsius, të ndikuara nga era, në momentin kur betimi do të mbahet.
Kjo nuk është hera e parë që një president amerikan e bën betimin në ambiente të brendshme. Rasti i fundit ka qenë në vitin 1985, kur Ronald Reagan filloi mandatin e tij të dytë në temperatura -14 gradë Celsius.
Për më shumë se 250 mijë të ftuar që kanë siguruar bileta për ceremoninë dhe për dhjetëra mijëra të tjerë që pritet të ndjekin paradën, po shqyrtohen plane alternative për të garantuar sigurinë dhe për të shmangur problemet e shkaktuara nga moti i acartë.
Ky inaugurim mbetet një prej ngjarjeve më të rëndësishme politike në SHBA, duke vazhduar traditën historike të betimit presidencial.