Një ngjarje tragjike ka prekur komunitetin shqiptar në Itali, ku një vajzë 13-vjeçare, Jennifer Alcani, humbi jetën pas një aksidenti të rëndë automobilistik në Abbadia Lariana.
Jennifer, e cila kishte dalë fshehurazi nga shtëpia pa dijeninë e prindërve, u largua për të kaluar mbrëmjen me dy miq më të mëdhenj. Në orët e para të mëngjesit, makina BMW Seria 1, me të cilën po udhëtonte, humbi kontrollin duke u përplasur me një parapet betoni. Makina, që udhëtonte me një shpejtësi mbi 150 km/h, drejtohej nga një 22-vjeçar i cili nuk kishte leje drejtimi dhe ishte nën ndikimin e alkoolit.
Jennifer, e cila ndodhej në sediljen e pasme dhe mbante rripin e sigurimit, pësoi trauma të rënda në kokë, duke rënë në koma të pakthyeshme. Pas 6 ditësh në spital, ajo ndërroi jetë më 16 janar, pa arritur të rikthehet në vetëdije.
Shoferi i makinës, i cili fillimisht tentoi të largohej nga spitali për të shmangur testin e alkoolit, tashmë përballet me akuzën e vrasjes në rrugë. Ndërkohë, miku i tij 19-vjeçar, i cili filmonte momentet e fundit të udhëtimit për TikTok, është përfshirë në hetimet mbi këtë ngjarje tragjike.
Jennifer, e njohur si “Xheni” nga miqtë e saj, ishte nxënëse në vitin e parë të shkollës së mesme në Lecco dhe kishte plane të mëdha për të ardhmen. Varrimi i saj do të mbahet të shtunën në Bazilikën e San Nicolò, ku pritet të marrin pjesë familjarë dhe miq të shumtë për t’i dhënë lamtumirën e fundit.
Ngjarja ka ngritur shqetësime mbi ndikimin e rrjeteve sociale dhe kulturën e rrezikut mes të rinjve, duke nxitur debate për nevojën e masave më të rrepta për sigurinë në rrugë.