Përplasja mes Partisë së Lirisë dhe SPAK-ut ka vijuar me akuzat e sekretarit të përgjithshëm të Partisë së Lirisë, Tedi Blushi, i cili pretendon se deputeti Vangjel Dule dhe eurodeputeti Fredi Beleri janë penguar të takojnë Ilir Metën në burgun 313 në Tiranë. Sipas Blushit, ky veprim është një shkelje flagrante e ligjit dhe e të drejtave të njeriut.
Në një deklaratë të ashpër, Blushi e cilësoi këtë si një veprim të qëllimshëm për të izoluar drejtuesit e opozitës. Ai akuzoi SPAK-un se po funksionon si një “vegël e verbër” e qeverisë, duke shtuar se institucioni special po vepron në funksion të axhendave politike dhe elektorale të kryeministrit Edi Rama.
“Në shkelje flagrante të ligjit, SPAK ka penguar sot dhunshëm deputetin dhe eurodeputetin të takojnë Ilir Metën në ambientet e burgut. Ligji e sanksionon qartë se institucionet e ekzekutimit të vendimeve penale mund të vizitohen pa autorizim nga deputetët dhe eurodeputetët. Por SPAK, i vetëshpallur mbi ligjin, po përdoret si instrument politik për të shantazhuar dhe përndjekur opozitën,” deklaroi Blushi.
SPAK reagon: S’kemi marrë asnjë kërkesë nga Dule dhe Beleri
Menjëherë pas akuzave të Blushit, Prokuroria e Posaçme kundër Korrupsionit dhe Krimit të Organizuar (SPAK) reagoi, duke mohuar se ka penguar ndonjë takim. Në sqarimin e saj, SPAK deklaroi se nuk është përgjegjëse për autorizimin e takimeve të deputetëve me të paraburgosurit, pasi kjo është në kompetencë të Drejtorisë së Përgjithshme të Burgjeve.
Sipas njoftimit të SPAK, deri në orën 15:15 të datës 31 janar, nuk është regjistruar asnjë kërkesë nga Dule dhe Beleri për të takuar Metën në burg.
“Në bazë të nenit 51 të ligjit nr. 81 të vitit 2020 “Për të Drejtat dhe Trajtimin e të Dënuarve me Burgim dhe të Paraburgosurve”, institucionet e ekzekutimit të vendimeve penale mund të vizitohen nga deputetët pa autorizim nga Prokuroria. Në këtë rast, miratimi jepet nga Drejtoria e Përgjithshme e Burgjeve. Deri tani, nuk ka mbërritur asnjë kërkesë e tillë,” thuhet në reagimin e SPAK.
Arrestimi i Metës dhe akuzat ndaj tij
Ish-presidenti dhe kreu i Partisë së Lirisë, Ilir Meta, u arrestua më 21 tetor me urdhër të SPAK nën akuzat për korrupsion, pastrim parash dhe fshehje të pasurisë. Arrestimi i tij ka shkaktuar reagime të forta politike, me përkrahësit e tij që e cilësojnë këtë si një sulm të drejtpërdrejtë politik ndaj opozitës.
Përplasja e fundit mes Partisë së Lirisë dhe SPAK-ut tregon për tensionet e vazhdueshme mes opozitës dhe institucioneve të drejtësisë, në një kohë kur çështjet e korrupsionit dhe hetimet ndaj zyrtarëve të lartë mbeten në qendër të debatit politik në Shqipëri.