Presidenti amerikan Donald Trump ka shkaktuar lëkundje të forta në bursat evropiane këtë fillim jave, pas njoftimit të tij për vendosjen e tarifave tregtare ndaj Bashkimit Evropian.
SHBA regjistroi një deficit tregtar prej 213 miliardë dollarësh me BE-në vitin e kaluar, një situatë që Trump e ka quajtur “një mizori” dhe ka argumentuar se tarifat e reja do të mbrojnë vendet e punës dhe prodhimin amerikan.
Eksportet kryesore evropiane drejt SHBA përfshijnë produktet farmaceutike, makinat dhe pajisjet industriale të avancuara. Nga ana tjetër, SHBA eksporton naftë, gaz dhe shërbime financiare në tregun evropian.
Ndikimi i tarifave do të jetë i ndryshëm për secilin vend të BE-së. Irlanda është vendi më i varur nga tregu amerikan, pasi pothuajse gjysma e eksporteve të saj jashtë BE-së shkojnë në SHBA. Gjermania, e njohur për eksportin e automjeteve, pritet të jetë një nga vendet më të prekura.
Bashkimi Evropian ka paralajmëruar një përgjigje të fortë ndaj tarifave të SHBA-së, duke sugjeruar mundësinë e një takse hakmarrëse mbi produktet amerikane.
Sa i përket Britanisë së Madhe, SHBA nuk ka një deficit të lartë tregtar me këtë vend, dhe në një moment të vitit të kaluar pati madje një suficit. Ky fakt i ka bërë ministrat britanikë të shpresojnë se Londra do të përjashtohet nga tarifat e Trump-it. Vetë presidenti amerikan ka deklaruar se “Britania është jashtë linjës, por BE është me të vërtetë jashtë linjës”.
Këto zhvillime e kanë përkeqësuar më tej situatën në tregjet financiare, duke ndikuar në vlerën e aksioneve dhe valutave në bursa. Analistët paralajmërojnë një periudhë të pasigurt për ekonominë globale, ndërsa BE-ja përgatit kundërpërgjigjen e saj ndaj lëvizjeve të Trump-it.