Chris LaCivita, arkitekti i fushatës së Donald Trump 2024, ka bërë një deklaratë të fortë pas emërimit si drejtues i fushatës së Partisë Demokratike për zgjedhjet e 11 majit.
LaCivita: “Berisha do të bashkëpunojë me Trump dhe SHBA”
Në një konferencë për shtyp, LaCivita falënderoi Sali Berishën dhe opozitën shqiptare për besimin e dhënë dhe deklaroi se PD ka mbështetjen e aleatëve konservatorë amerikanë.
“Ne jemi këtu sepse duam të ndihmojmë të zgjedhim një kryeministër që është mik i vërtetë i SHBA dhe që do të bashkëpunojë me sukses me presidentin Trump.”
Ai theksoi se shqiptarët kërkojnë ndryshim dhe krahasoi situatën politike në Shqipëri me atë në SHBA.
“Ashtu si amerikanët, edhe shqiptarët duan më shumë nga qeveria e tyre. Ata kërkojnë një drejtim të ri dhe e dinë se Berisha mund të fitojë.”
Sulm ndaj Ramës: “Marionetë e Sorosit”
LaCivita nuk kurseu kritikat ndaj Edi Ramës, duke e cilësuar atë si një “marionetë të Sorosit” dhe duke argumentuar se lidhjet e tij me miliarderin amerikan kanë dëmtuar marrëdhëniet e Shqipërisë me administratën konservatore në SHBA.
“Nuk mund të jesh një marionetë e Sorosit dhe të jesh mik i SHBA-ve, kjo thjesht nuk është e mundur.”
Sipas tij, familja Soros ka humbur ndikimin në Uashington, dhe kjo do të reflektohet edhe në zgjedhjet në Shqipëri.
Një strategji fituese për PD-në?
Përfshirja e Chris LaCivita në fushatën e PD-së tregon një synim të qartë për të përdorur strategjitë republikane të suksesshme për të rritur mbështetjen elektorale.
11 maji pritet të jetë një përballje e ashpër mes opozitës dhe mazhorancës, me një fushatë më të organizuar dhe më të fortë se kurrë më parë.