Policia Rrugore e Tiranës ka ndërmarrë një aksion të gjerë për heqjen e makinave të parkuara gabimisht, të cilat po pengonin qarkullimin normal të automjeteve dhe këmbësorëve në kryeqytet. 65 automjete janë dërguar në pikën e bllokimit të Komisariatit të Policisë Rrugore, prej të cilave 15 vetëm sot.
Monitorime të shtuara dhe masa ndëshkimore
Në bashkëpunim me Komisariatet e Policisë në Tiranë, Policia Rrugore ka shtuar kontrollet në rrugët e brendshme të qytetit, për të identifikuar dhe ndëshkuar shoferët që bllokojnë rrugët dhe krijojnë trafik përmes parkimeve të gabuara.
“Monitorimet do të vijojnë në të gjithë territorin e Tiranës për të garantuar lëvizjen e lirë të automjeteve dhe këmbësorëve,” – njofton Policia Rrugore.
Apeli i policisë për drejtuesit e mjeteve
Policia ka apeluar që shoferët të mos parkojnë në vendet që pengojnë qarkullimin, përndryshe automjetet e konstatuara do të zhvendosen me vinç dhe dërgohen në pikën e ruajtjes.
Ky aksion do të vazhdojë edhe në ditët në vijim për të ulur trafikun dhe përmirësuar lëvizjen në kryeqytet.