Kryeministri Edi Rama ka deklaruar se Partia Socialiste mbetet një forcë politike gjithëpërfshirëse, duke theksuar se do të vazhdojnë dëgjesat me qytetarët dhe aktorët e ndryshëm, përveç atyre që janë nën hetim ose të akuzuar.
Në fjalën e tij, Rama shigjetoi kundërshtarët politikë, duke paralajmëruar se më 11 maj do t’u bëjnë atyre një “prezantim fundor”, duke përdorur shprehjen ironike “noc rrokun”.
“Ne jemi të vërtetë dhe të drejtpërdrejtë. Kemi qëndruar në heshtje për pesë vite për të ruajtur pavarësinë e institucioneve. Por tani kërkojmë profesionalizëm dhe integritet demokratik. Partia Socialiste është partia e të gjithëve. Ata që janë mbledhur kundër nesh do ta kuptojnë më 11 maj,” tha Rama.
Ai gjithashtu akuzoi SPAK dhe sistemin e drejtësisë për tejkalim të kufijve të ekzekutivit, duke pretenduar se punonjësit e administratës janë traumatizuar nga thirrjet dhe hetimet e vazhdueshme.
Duke folur për SPAK, ai theksoi nevojën për një qasje të balancuar në luftën kundër korrupsionit dhe krimit të organizuar, duke sugjeruar që duhen përmirësime në analizën e rasteve dhe shërbime ndërkombëtare të konsulencës për drejtësinë.
“Njerëzit nuk janë domate, nuk janë kavie. Ata meritojnë respekt deri në fund. PS është e vetmja forcë politike që mendon për qytetarët dhe për të drejtat e tyre,” shtoi ai, duke theksuar se zgjedhjet e 11 majit do të jenë një moment vendimtar për të ardhmen e drejtësisë në Shqipëri.