Armand Duka, presidenti i Federatës Shqiptare të Futbollit dhe pronar i kompanisë “AIBA”, ka fituar ankandin e Korporatës së Investimeve Shqiptare (KISH) për të ndërtuar dy kulla të larta në ish-godinën e Agjencisë Telegrafike Shqiptare (ATSH).
Sipas dokumenteve të publikuara, kompania “AIBA”, me adresë në Shkozet, Durrës, ka dalë fituese me një ofertë prej 46.1%, duke mposhtur shoqërinë “Progeen” shpk, e cila kishte ofruar 45%.
Ndërtimi dhe përfitimet
Në truallin shtetëror ku aktualisht ndodhet Qendra e Shërbimeve Arsimore, dikur ATSH dhe Ministria e Mjedisit, do të ndërtohet VOID Tower, një kompleks i përbërë nga dy kulla shumëkatëshe me një sipërfaqe ndërtimi prej 87 mijë m². Investimi parashikohet të arrijë në 110 milionë euro.
Qeveria do të përfitojë një përqindje nga ndërtimi, ndërsa ndërtesa do të administrohet nga privati, duke shfrytëzuar hapësirat për apartamente dhe një qendër tregtare.
Procesi i përzgjedhjes dhe projekt-ideja
Projekti është hartuar nga grupi arkitekturor “Andrea Kaputo & Focus Architecture & OpenFabric & James Beckett”. Korporata ka përcaktuar si kusht bazë për përzgjedhjen e partnerit privat një përqindje minimale prej 45% për shtetin, ku “AIBA” rezultoi ofertuesi me vlerën më të lartë.
Në përfundim të procesit, kompania do të lidhet me Korporatën e Investimeve Shqiptare për një kontratë sipërmarrjeje dhe marrëveshje të tjera për zhvillimin e projektit.
Ky projekt shënon një tjetër transformim të pronës shtetërore në një investim privat, ku shteti do të marrë një përqindje nga ndërtimi, ndërsa kompania private do të menaxhojë godinën e re në një nga zonat më të rëndësishme të Tiranës.