Deputeti Enkelejd Alibeaj ka vendosur të tërhiqet nga rekursi i depozituar në Gjykatën e Lartë për vulën dhe logon e Partisë Demokratike, një proces në të cilin ai përfaqësonte Lulzim Bashën.
Alibeaj: Nuk kam më interes për PD-në
Në një deklaratë për mediat, Alibeaj sqaroi se kur kishte depozituar rekursin ndodhej në një pozicion tjetër, si kryetar i komanduar i PD-së. Ndërsa tani, ai ka themeluar një subjekt të ri politik dhe nuk ka më interes për çështjet ligjore të PD-së.
“Nuk kam asnjë synim të marr drejtimin e PD-së, logon apo vulën përmes gjykatës. Ky vendim është individual dhe nuk ndikon te personat e tjerë që mund ta synojnë këtë gjë,” – u shpreh Alibeaj.
Ai theksoi se nuk ka më interes të ndjekë procesin ligjor për logon dhe vulën e PD-së, pasi tashmë është i angazhuar në një tjetër formacion politik dhe pjesë e një koalicioni të ri.
Ky veprim pritet të ndikojë në dinamikën e brendshme të Partisë Demokratike, ndërkohë që çështja e logos dhe vulës mbetet ende një pikë e hapur për debat mes grupimeve brenda PD-së.