Kryeministri Edi Rama ka publikuar një video me Sekretarin e Përgjithshëm të Kryeministrisë, Engjëll Agaçi, duke reaguar ndaj akuzave të Sali Berishës se Agaçi ishte arratisur për t’iu shmangur drejtësisë.
Në postimin e tij, Rama theksoi se Agaçi nuk ishte në arrati, por në gjendje kritike për jetën, duke kaluar një operacion në zemër dhe më pas një periudhë të vështirë në reanimacion.
Rama kundër “propagandës kënetore”
Rama i cilësoi akuzat e opozitës si spekulime dhe propagandë, duke thënë se media dhe politikanë të caktuar e kishin shpallur Agaçin të arratisur, ndërkohë që ai ndodhej në një gjendje shëndetësore kritike.
“Ky është Sekretari i Përgjithshëm i Kryeministrisë, Engjëll Agaçi, të cilin Bufi i Kënetës e shpalli arratiak në kërkim nga drejtësia dhe e gjithë aradheja kënetore, kanal më kanal e portal më portal, ia telendisi familjen e të afërmit, teksa tjetri ishte në fije të perit në reanimacion,” – shkroi Rama.
Akuzat dhe kundërpërgjigja e Ramës
Opozita kishte pretenduar se Agaçi ishte zhdukur për t’i shpëtuar hetimeve, por videoja e publikuar nga kryeministri synon të përgënjeshtrojë këto akuza dhe të tregojë se ai ndodhet në vendin e tij të punës.
Kjo përplasje mes mazhorancës dhe opozitës vjen në një moment të tensionuar politik, ku emri i Engjëll Agaçit është përmendur shpesh në debatin mbi reformat në drejtësi dhe hetimet e SPAK.