Kosovë – Sot, më 5 mars 2025, shënohet 27-vjetori i rënies heroike të komandantit legjendar Adem Jashari, familjes së tij dhe luftëtarëve të tjerë të Ushtrisë Çlirimtare të Kosovës në betejën e Prekazit.
Kujtimi i sakrificës për liri
Në 5, 6 dhe 7 mars 1998, forcat serbe rrethuan Prekazin dhe nisën një sulm të pamëshirshëm, me qëllim shuarjen e rezistencës shqiptare. Gjatë kësaj përleshjeje, 55 shqiptarë u vranë, mes tyre 22 anëtarë të familjes Jashari, përfshirë gra dhe fëmijë. Vetëm dy persona mbijetuan: Bashkimi, djali i Rifatit, dhe Besarta, vajza e Hamzës.
Përkujtimi shtetëror dhe aktivitetet zyrtare
Qeveria e Kosovës ka shpallur tri ditë përkujtimore me një sërë aktivitetesh në nder të Epopesë së UÇK-së:
- Ora e parë mësimore në të gjitha shkollat i kushtohet Epopesë.
- Mbledhja solemne e Qeverisë së Kosovës dhe seanca solemne në kuvendet komunale.
- Homazhe në Kompleksin Memorial “Adem Jashari” dhe në komplekset e dëshmorëve në të gjithë Kosovën.
- Parada ushtarake e Forcave të Sigurisë së Kosovës (FSK) në Prishtinë.
- Turne sportive në Skenderaj, përfshirë futsall dhe volejboll.
- Akademi përkujtimore në Prishtinë më 7 mars.
- Nata e Zjarreve në Prekaz, duke simbolizuar dritën e sakrificës dhe lirisë.
Simboli i qëndresës dhe lirisë
Sakrifikimi i familjes Jashari mbetet një nga momentet më të rëndësishme të historisë së Kosovës, duke shënuar fundin e frikës dhe hapjen e rrugës për luftën çlirimtare. Prekazi vazhdon të jetë qendra e krenarisë kombëtare, ku çdo vit shqiptarët nga mbarë trojet përkulen me respekt dhe nderim.