Prej gjashtë netësh radhazi, qytetet kryesore të Turqisë janë përfshirë nga protesta masive, pasi autoritetet arrestuan dhe shkarkuan nga detyra kryebashkiakun e Stambollit, Ekrem Imamoglu, një nga rivalët më të fortë të presidentit Recep Tayyip Erdogan. Pavarësisht ndalimit të tij, partia opozitare CHP e konfirmoi Imamoglun si kandidat presidencial, në një lëvizje që ka ndezur zemërimin popullor dhe ka sjellë mijëra qytetarë në rrugë.
Nga Stambolli në Ankara: Zëri i popullit kundër autoritarizmit
Në Stamboll, mijëra studentë u mblodhën në marshime drejt administratës së qytetit, ndërsa banorët mbështetën protestën duke goditur tenxhere nga ballkonet. Në Ankara, thirrjet për dorëheqjen e qeverisë dëgjoheshin qartazi në rrugët e kryeqytetit, ndërsa udhëheqësi i CHP-së Özgür Özel i bëri thirrje qytetarëve të bojkotojnë bizneset që lidhen me pushtetin.
Erdogan kërcënon opozitën LIVE në TV
Presidenti Erdogan reagoi me fjalë të ashpra në një fjalim televiziv, duke paralajmëruar:
“Mos prishni qetësinë e bashkëqytetarëve tanë me provokimet tuaja. Mos luani me nervat e kombit.”
Ai e quajti lëvizjen qytetare si një “akt dhune të majtë” dhe paralajmëroi mbajtjen përgjegjëse të opozitës për çdo përplasje me forcat e rendit.
Arrestime masive dhe tension në rritje
Sipas Ministrisë së Brendshme të Turqisë, mbi 1000 persona janë arrestuar që nga fillimi i protestave. Demonstratat vazhdojnë në Izmir, Ankara, Stamboll dhe qytete të tjera, duke krijuar një klimë tensioni politik dhe shoqëror që i ngjan fillimeve të një përplasjeje të thellë mes qytetarëve dhe regjimit.