Ndërhyrja në TIMS: Ish-drejtori i IT në polici akuzohet për hyrje të paautorizuar kompjuterike

0

Prokuroria e Tiranës ka përfunduar hetimet dhe ka çuar për gjykim ish-drejtorin e IT-së në Policinë e Shtetit, Ervin Muça, i cili akuzohet për veprën penale të “hyrjes së paautorizuar kompjuterike”, në lidhje me sistemin TIMS.

Sipas organit të akuzës, Muça ka urdhëruar hapjen e portave USB, duke lejuar hyrjen e të dhënave në një pajisje hard disk të jashtëm, proces që nuk justifikohet nga nevojat operative të sistemit, pasi TIMS realizon automatikisht dy kopje rezervë (back up). Prokuroria thekson se për këtë proces nuk është njoftuar drejtoria e përgjithshme e Policisë dhe mungojnë dokumentet zyrtare mbi procedurat e ndërmarra.

Hetimet zbuluan gjithashtu se në ndërtesë kanë hyrë persona të paautorizuar, mes tyre shtetasi me inicialet K. M., i cili nuk ishte pjesë e stafit dhe përdorte PIN-in personal të një punonjësi tjetër për të hyrë në sistem. Ky person ndihmoi në procesin e back up gjatë natës së 1 shtatorit 2023.

Gjurmët teknike në hard diskin e sekuestruar konfirmojnë përpjekjen për të transferuar të dhëna nga serverat e sistemit TIMS në mënyrë manuale, ndonëse procesi nuk u përfundua plotësisht. Kjo ka ngritur dyshime të forta për qëllime të fshehta dhe ndërhyrje të paligjshme, të cilat cenojnë sigurinë e të dhënave të sistemit më të ndjeshëm të Policisë së Shtetit.

Çështja ndaj tij është ndarë edhe për veprën penale të “shpërdorimit të detyrës”, për të cilën hetimet do të vijojnë veçmas.

Prokuroria e Tiranës ka dorëzuar dosjen në gjykatë, ndërsa Muça ndodhet aktualisht në masën e sigurisë “arrest në shtëpi.”

Ky rast ngre shqetësime serioze mbi integritetin e sistemeve të të dhënave të sigurisë kombëtare dhe transparencën në procedurat e menaxhimit të IT-së në institucionet shtetërore.

Artikulli i mëparshëmSot Nata e Kadrit – Nata që vlen më shumë se një mijë muaj
Artikulli i radhësRei Manaj sfidon kapitenin e Arsenalit për çmimin “Lojtari më i Mirë” të raundit në eliminatoret e Botërorit