Pas një muaji agjërimi, reflektimi dhe përkushtimi shpirtëror, mijëra besimtarë myslimanë në të gjithë Shqipërinë u mblodhën sot, më 30 mars 2025, për të festuar Fitër Bajramin. Në qendër të kryeqytetit, “Sheshi Skënderbej” u mbush që në orët e para të mëngjesit me mijëra qytetarë që kryen faljen e madhe nën drejtimin e kreut të KMSH, Bujar Spahiu.
Ceremonia nisi në orën 06:45 me leximin e Kuranit dhe një ligjëratë ku theksoheshin vlerat e Ramazanit si përkushtimi, mëshira dhe drejtësia. Falja e namazit u zhvillua në ora 07:30 dhe u pasua nga pritjet tradicionale në selinë e KMSH-së.
Mesazhet: Paqe, unitet dhe vlera njerëzore
Kryetari i Komunitetit Mysliman të Shqipërisë, Bujar Spahiu, uroi të gjithë besimtarët, duke theksuar rëndësinë e solidaritetit dhe kujdesit ndaj njerëzve në nevojë.
“Fitër Bajrami është një urë mes asaj që kemi mësuar në Ramazan dhe jetës sonë të përditshme. Na kujton unitetin, mëshirën dhe drejtësinë”, deklaroi Spahiu, ndërsa bëri thirrje për reflektim të thellë shoqëror dhe përfshirje më të madhe në vepra të mira.
Pjesëmarrje masive në të gjithë qytetet shqiptare
Ceremonitë festive u mbajtën në të gjitha qytetet e vendit – nga Shkodra në Vlorë, nga Elbasani në Lushnjë, nga Kukësi në Korçë – ku besimtarët u mblodhën për të ndarë momente të rëndësishme bashkimi dhe lutjeje. Në shumë qytete, falja u zhvillua në sheshe publike për shkak të pjesëmarrjes së lartë.
Në Vlorë, për shkak të mbylljes së Xhamisë së Plumbit, falja u mbajt në Pallatin e Sportit. Në Shkodër, mesazhi kryesor ishte pendimi dhe mëshira hyjnore, ndërsa në Durrës, Kukës, Berat dhe Fier, theksi u vu mbi paqen, respektin dhe vlerat e familjes.
Vlerësime ndërkombëtare: Shqipëria, shembull i tolerancës ndërfetare
Një mesazh të veçantë për këtë festë dha edhe Sekretari i Përgjithshëm i Ligës Botërore të Islamit, Dr. Muhamed Bin Abdulkerim El-Isa, i cili mori pjesë në faljen e organizuar në Tiranë. Ai vlerësoi Shqipërinë si një model global të bashkëjetesës dhe tolerancës ndërfetare:
“Bota ka nevojë të ndjekë shembullin e shoqërisë shqiptare”, tha ai, duke e cilësuar bashkëjetesën fetare në Shqipëri si një pasuri që duhet ruajtur dhe promovuar brez pas brezi.
Urime nga drejtuesit më të lartë të shtetit
Presidenti Bajram Begaj dhe Kryeministri Edi Rama uruan besimtarët me mesazhe për paqe, përkushtim dhe dashuri. Rama theksoi devotshmërinë e besimtarëve gjatë muajit të shenjtë, ndërsa Begaj e cilësoi Bajramin si një festë të shpresës dhe shpirtit të pajtimit.
Fitër Bajrami – festë e lutjes dhe angazhimit për të tjerët
Përtej ritualeve fetare, Fitër Bajrami është një thirrje për më shumë humanizëm dhe ndihmë ndaj atyre që janë në nevojë. Besimtarët ndanë ushqime, dhurata dhe vizituan të afërmit, duke kthyer këtë ditë në një moment të veçantë solidariteti.