Një skandal serioz ka tronditur tregun shqiptar të produkteve ushqimore, pasi është zbuluar se 7.8 ton mish pule i importuar nga Brazili përmes kompanisë AMG FOOD ka rezultuar i kontaminuar me salmonelë. Sipas të dhënave zyrtare, vetëm 5.2 ton janë bllokuar nga autoritetet, ndërsa 2.6 ton mish i kontaminuar mendohet të ketë hyrë në qarkullim dhe të jetë shpërndarë për konsum.
Në qendër të kësaj skeme që lidhet me rrezik serioz për shëndetin publik ndodhet biznesmeni Mond Goxha, pronar i AMG FOOD dhe markës DIMAL, produkte të cilat tregtohen në rrjetet më të mëdha të supermarketeve në vend.
Një nga këto rrjete është Big Market, në pronësi të deputetit socialist Vullnet Sinaj, i cili më 27 mars, vetëm një ditë para se lajmi për kontaminimin të bëhej publik, shpërndau katalogun e ofertave për Bajram. Aty përfshiheshin edhe produkte të markës DIMAL, përfshirë:
- Salçiçet e pulës DIMAL (400 gr) me ofertë 1+1 falas për vetëm 299 lekë
- Fileto pule DIMAL me çmim të ulur nga 600 në 499 lekë/kg
Kjo ka ngritur dyshime serioze te qytetarët se ulja drastike e çmimeve mund të jetë një përpjekje për të shitur sa më shpejt stoqet problematike pas shpërthimit të skandalit më 28 mars.
Për më tepër, Ministrja e Bujqësisë, Anila Denaj, konfirmoi publikisht se 51 subjekte kishin blerë mishin e kontaminuar, por refuzoi të bëjë publike emrat, me justifikimin se “çështja është nën hetim”.
Big Market nuk ka mohuar lidhjen me markën DIMAL, ndërkohë që vazhdon t’i ofrojë produktet e saj në katalogët zyrtarë, pa asnjë paralajmërim për konsumatorët.
Çfarë mbetet pa përgjigje?
- A janë ndër këto 2.6 ton të shpërndara produktet që përfunduan në raftet e Big Market?
- Pse nuk është bërë transparencë për emrat e 51 subjekteve?
- Pse u lejuan ofertat për një produkt të dyshuar për rrezik shëndetësor?
Nëse dyshimet konfirmohen, kjo do të përbënte jo vetëm një skandal ushqimor, por edhe një krim i rëndë në dëm të sigurisë publike, me përfshirje të drejtpërdrejtë të strukturave të lidhura me politikën dhe tregtinë e madhe.
Publiku ka të drejtë të dijë: Kush po na ushqen me rrezik? Kush po fshihet pas ofertave të Bajramit?