Ditën që amerikanët u rikthyen në SPAK, GJKKO urdhëron hetim penal ndaj Olta Xhaçkës dhe bashkëshortit të saj – A është kjo rastësi?

0

Më 1 prill 2025, ndërsa vizita e zyrtarëve amerikanë në Shqipëri dhe angazhimi i tyre për drejtësinë po dominonte axhendën politike, një tjetër zhvillim i rëndësishëm shpërtheu në skenën e brendshme: Gjykata e Posaçme kundër Korrupsionit dhe Krimit të Organizuar (GJKKO) urdhëroi SPAK-un të regjistrojë një procedim penal ndaj ish-ministres Olta Xhaçka dhe bashkëshortit të saj, Artan Gaçi, për një çështje të nxehtë që përfshin akuza për falsifikim dokumentesh, pastrim parash dhe shpërdorim detyre.

Ky vendim vjen pas një ankimi të bërë nga Alfred Beleri, i cili pretendon se prona në bregdetin e Himarës është tjetërsuar dhe i është shitur Gaçit nëpërmjet një zinxhiri vendimesh të dyshimta, përfshirë edhe përfitimin e statusit të investitorit strategjik.

GJKKO e argumenton qartë:

“Shtetasja Olta Xhaçka ka përfituar të drejta pasurore nëpërmjet një prone që fillimisht është regjistruar si tokë truall, më pas është shndërruar në tokë bujqësore për t’u përfituar në mënyrë të paligjshme… Ajo nuk ka deklaruar konfliktin e interesit dhe ka qenë në detyrën e Ministres së Mbrojtjes dhe deputetes në momentin e vendimeve.”

Për herë të parë, një gjykatë shqiptare e detyron SPAK-un të hetojë drejtpërdrejt një ish-ministre të jashtme në detyrë, për një skemë që përfshin prona bregdetare, status investitorësh dhe vendime qeveritare në konflikt të pastër interesi.

Ndërkohë, po më 1 prill, amerikanët u rikthyen në SPAK, me vizita dhe mbështetje të qartë për institucionet e drejtësisë së re. A është ky një sinjal për pastrimin e shtëpisë politike, apo një rastësi në kalendar?

Sipas analistëve, rastet si ky i Xhaçkës, që më parë janë mbyllur nga SPAK me justifikime procedurale, po marrin një kthesë të re falë presionit publik, ndërkombëtar dhe vendimeve gjithnjë e më të ashpra të GJKKO-së.

Kujtojmë që kjo çështje vjen vetëm pak ditë pas dënimit me burg të ish-kryebashkiakut të Himarës, Jorgo Goro, një tjetër hallkë e përfshirë në tjetërsimin e pasurisë në favor të Gaçit.

Pyetja që ngrihet tashmë është kjo:
A do të shkojë SPAK deri në fund të kësaj dosjeje që prek themelet e pushtetit socialist dhe një figurë të rëndësishme si Olta Xhaçka?
Apo gjithçka do të mbetet një rast i radhës për konsum publik?


Artikulli i mëparshëmGëzim Sinemati përplaset me Ilir Demaliajn në emision: “Ti mbështet diktaturën sportive”
Artikulli i radhësSkandal ushqimor për Bajram: A është shitur mish me salmonelë në ofertë nga Big Market i Vullnet Sinajt?