Kreu i Ballit Kombëtar, Adriatik Alimadhi, ka reaguar për herë të parë pas shoqërimit të dhunshëm nga Policia e Tiranës, duke akuzuar publikisht forcat e rendit për shkelje flagrante të ligjit, dhunë fizike dhe verbale, si dhe për motivim politik të ngjarjes.
Në një deklaratë të gjatë në rrjetet sociale, Alimadhi rrëfen se është ndaluar teksa ndodhej në lokalin e vëllait për të bërë plane për fushatën, dhe është tërhequr zvarrë, goditur me grushte dhe sharë rëndë nga një punonjës policie brenda furgonit.
“Ashtu siç e keni parë në pamjet filmike, më kanë tërhequr zvarrë, më vendosën duart mbrapa kokës dhe më goditën sikur të isha kriminel. Brenda furgonit, një prej tyre më shante dhe më kërcënonte për jetën e familjes,” shkruan Alimadhi.
Ai mohon kategorikisht akuzat për ushtrim të aktivitetit të lojërave të fatit, për të cilat policia pretendon se ka pasur një verifikim në lokal.
“Nuk kam luajtur kurrë lloto. As e di si luhet. As në lokalin e vëllait nuk u gjet asgjë,” deklaron ai.
Alimadhi thekson se identiteti i tij si kreu i një partie politike është injoruar dhe se veprimet e policisë kishin qëllim intimidimi dhe shantazhi politik përmes patronazhistëve të infiltruar në strukturat shtetërore.
Pas disa orësh në Komisariatin Nr. 4, Alimadhi u la i lirë pa asnjë masë ndalimi, ndërsa Autoriteti i Mbikëqyrjes së Policisë ka marrë kallëzimin e tij për dhunë dhe abuzim me detyrën.
“Nuk do na ulni kokën. Jemi të djathtë dhe të tillë do vdesim. Nuk frikësohemi nga bandat në pushtet,” përfundon Alimadhi, duke falënderuar aleatët dhe qytetarët për mbështetjen në këtë që ai e konsideron një akt të pastër politik dhe kriminal nga regjimi në pushtet.