Një incident i rëndë ka ndodhur paraditen e sotme pranë tunelit të Skërficës, ku autobuzi i linjës Sarandë–Tiranë është përfshirë nga flakët gjatë lëvizjes.
Ngjarja ka ndodhur rreth orës 11:40, në afërsi të fshatit Kardhiq, një nyje kyçe në rrugën strategjike Kardhiq–Delvinë, e cila prej pak kohësh është hapur për qarkullim dhe ka shkurtuar ndjeshëm kohën e udhëtimit drejt bregdetit jugor.
Sipas burimeve paraprake të Policisë së Delvinës, zjarri dyshohet të jetë shkaktuar nga një defekt në motor. Në momentin e ngjarjes, autobusi ishte në lëvizje dhe brenda tij ndodheshin udhëtarë.
Fatmirësisht nuk ka të lënduar, por automjeti ka pësuar dëme materiale të konsiderueshme. Drejtuesi i autobusit është identifikuar si shtetasi G. A.
Grupi hetimor ndodhet në vendngjarje dhe po punon për zbardhjen e plotë të rrethanave të incidentit, ndërkohë që pritet ekspertiza teknike për të përcaktuar shkakun përfundimtar të zjarrit.
Ngjarja ka rikthyer në vëmendje nevojën për kontrolle teknike rigoroze të mjeteve të transportit publik, sidomos në linjat turistike me fluks të lartë.