Gjykata e Posaçme Kundër Korrupsionit dhe Krimit të Organizuar (GJKKO) ka lënë në fuqi masën e arrestit me burg për ish-policin Altin Morina, i dyshuar për bashkëpunim me Durim Bamin dhe përfshirje në veprimtari të paligjshme.
Gjatë seancës gjyqësore të mbajtur këtë të shtunë, Morina refuzoi të japë shpjegime përpara gjyqtares së posaçme Flojera Davidhi. Ndërkohë, mësohet se të dielën do të zhvillohet një tjetër seancë, në lidhje me akuzën për armëmbajtje pa leje, pasi gjatë kontrollit fizik ndaj tij u sekuestrua një armë zjarri tip pistoletë.
Morina u arrestua një ditë më parë, pasi ishte shpallur në kërkim nga SPAK, për veprën penale “Kultivimi i bimëve narkotike”, kryer në kuadër të një grupi të strukturuar kriminal.
Sipas burimeve hetimore, gjatë operacionit, u sekuestrua arma si provë materiale, ndërsa hetimet e SPAK janë pjesë e një zinxhiri më të gjerë që përfshin figura të njohura të botës së krimit dhe ish-zyrtarë të përfshirë në mbrojtjen e këtyre rrjeteve.
Rasti i Morinës pritet të ndezë debate të reja për implikimin e strukturave të shtetit në krimin e organizuar, në një periudhë të ngarkuar politike dhe institucionale.