Në 24 shkurt 2025, Erion Veliaj shpërtheu në akuza ndaj prokurorit Ols Dado, duke pretenduar publikisht se ishte fyer në sallën e gjyqit me fjalët “ndyrësirë”, “gënjeshtar” dhe “patologjik”. Mediat pranë Veliajt e përhapën menjëherë këtë version, duke kërkuar mbështetje publike dhe reagim të ashpër institucional.
Por e vërteta shpërthen nga brenda qelisë së burgut të Durrësit, ku Veliaj ndodhej nën masë sigurie. Përgjimet e zbardhura nga hetimet tregojnë qartë: audioja që përmendet nga Veliaj është manipuluar qëllimisht, me ndërhyrje teknike të organizuara nga vetë ai dhe bashkëshortja e tij, Ajola Xoxa.
Në një bisedë të orës 15:20, Ajola i konfirmon Veliajt se po punohet me audion dhe transkriptin, për të pastruar zërin dhe për ta bërë më të dëgjueshme – ndonëse në origjinal, fjalët fyese nuk ekzistojnë.
“Mos fol shumë në telefon, se jemi në përgjim”, i thotë Veliaj, i ndërgjegjshëm për natyrën e bisedës. Ai kërkon që materiali të përgatitet për redaktorin dhe të publikohet sa më shpejt, ndërkohë që Ajola i premton se do flasë me “çunat” që e kanë në dorë audion.
Në orën 16:00, Veliaj kthehet në telefon sërish për të ndjekur ecurinë. Ajola e siguron se gjithçka është drejt finalizimit. Qëllimi: të manipulohet opinioni publik, të sulmohet drejtësia dhe të krijohet një viktimë e rreme në emër të një gënjeshtre politike.
Në fund, SPAK dhe GJKKO hodhën poshtë akuzat ndaj prokurorit Ols Dado, duke deklaruar zyrtarisht se ai nuk kishte përdorur asnjë nga fjalët që pretendonte Veliaj. Por, ndërkohë, vendimi për të sajuar një audio të rreme ishte marrë dhe zbatuar me vetëdije nga çifti Veliaj–Xoxa.
Një skandal që e nxjerr zbuluar të gjithë makinën e manipulimit brenda mazhorancës.