Presidenti i Shteteve të Bashkuara, Donald Trump, ka lëshuar një deklaratë të fortë në rrjetet sociale, ku bën thirrje për përfundimin e menjëhershëm të luftës mes Rusisë dhe Ukrainës, duke premtuar bashkëpunim ekonomik dhe zhvillim të madh tregtar me SHBA-në për të dy vendet.
“Shpresoj që Rusia dhe Ukraina të arrijnë një marrëveshje këtë javë. Pastaj, do të fillojnë të bëjnë biznes të madh me Shtetet e Bashkuara të begata të Amerikës dhe do të përfitojnë shumë para”, shkruan Trump.
Deklarata vjen në një moment kritik për përpjekjet ndërkombëtare për një armëpushim të qëndrueshëm, ndërsa Rusia dhe Ukraina kanë shkëmbyer akuza për thyerjen e pauzës së Pashkëve.
Me këtë qëndrim, Trump përforcon doktrinën e tij të diplomacisë përmes tregtisë, duke e pozicionuar SHBA-në si një faktor kyç për rindërtimin ekonomik të zonave të shkatërruara nga lufta, nëse palët ndalin përplasjen ushtarake.
Ndonëse aktualisht bisedimet për paqe mes Moskës dhe Kievit janë në ngërç, presioni i ri nga Uashingtoni mund të ndikojë në dinamikat politike dhe të rrisë interesin për një zgjidhje të negociuar.