Një ngjarje tragjike ka tronditur sot qytetin e Gjirokastrës, ku një 17-vjeçar, me inicialet V.P., u gjet pa shenja jete në banesën e tij në fshatin Valare. Dyshohet se i riu është vetëvarur, ndërsa grupi hetimor dhe Policia po hetojnë rrethanat e ngjarjes së rëndë.
Rreth orës 13:30, adoleshenti u transportua nga familjarët në Spitalin Rajonal të Gjirokastrës, por mjekët konstatuan se ai kishte ndërruar jetë më parë. Policia ka sekuestruar telefonin dhe sende të tjera personale, ndërsa po merren në pyetje bashkëmoshatarë dhe nxënës të shkollës “Siri Shapllo”, ku i ndjeri ishte nxënës.
Kjo është vetëvrasja e dytë brenda dy muajsh në të njëjtën shkollë, duke thelluar shqetësimet për problemet e pazbuluara të shëndetit mendor tek adoleshentët dhe mungesën e strukturave mbështetëse psikologjike në shkolla.
Të afërm të familjes Peçi thanë se i riu kishte shfaqur shenja të izolimit dhe melankolie, por nuk ishte nën ndonjë trajtim mjekësor. Familja, me origjinë nga fshati Picar, ndodhet në tronditje totale, ndërsa komuniteti lokal është i zhytur në dhimbje dhe heshtje.
Ngjarja ka sjellë në vëmendje domosdoshmërinë për ndërhyrje urgjente në sistemin arsimor, duke filluar me shtimin e psikologëve, përfshirjen aktive të mësuesve dhe ndërtimin e një kulture të re që pranon, identifikon dhe mbështet problemet mendore te të rinjtë.
Shkolla “Siri Shapllo” gjendet tashmë nën dritën e kritikave, ndërsa autoritetet arsimore nuk kanë reaguar publikisht për të shpjeguar çfarë masash janë marrë pas ngjarjes së parë. A është kjo një rastësi tragjike apo një sinjal i qartë i dështimit institucional për të mbrojtur jetën e nxënësve?
Hetimet vijojnë, por pasoja më e rëndë është humbja e një jete të re dhe frika se kjo mund të mos jetë e fundit në mungesë të një reagimi real institucional.