Gjykata e Posaçme kundër Korrupsionit dhe Krimit të Organizuar ka shpallur fajtor dhe ka dënuar me 3 vite burg ish-kryeinspektorin e IMT Elbasan, Andri Mehja, për korrupsion pasiv.
Sipas njoftimit zyrtar, Prokuroria e Posaçme kishte paraqitur kërkesën për gjykim ndaj Andri Mehja dhe Gentian Bako, të akuzuar për kryerjen e veprës penale “Korrupsioni pasiv i personave që ushtrojnë funksione publike”, në bashkëpunim.
Gjykimi u zhvillua me procedurë të shkurtuar, dhe në vendimin nr. 32, datë 25.04.2025, trupi gjykues i përbërë nga gjyqtarët Bib Ndreca, Erjon Bani dhe Rudina Palloj vendosi:
- Deklarimin fajtor të Andri Mehjas dhe dënimin e tij me 3 vite burg, që me uljen për shkak të gjykimit të shkurtuar përfundon në 2 vite burgim efektiv.
- Heqjen e të drejtës për të ushtruar funksione publike për 5 vite.
- Vendosjen në shërbim prove për 4 vite, me kushtin që të mos kryejë vepra të tjera penale.
- Pezullimin e ekzekutimit të dënimit, me detyrim për t’u paraqitur pranë Shërbimit të Provës në Elbasan.
Ky vendim konsiderohet një tjetër goditje e drejtësisë kundër zyrtarëve të përfshirë në afera korruptive, dhe përforcon rolin e GJKKO-së në luftën ndaj korrupsionit institucional.