Rreth orës 19:15 të mbrëmjes së sotme, në zonën e Farkës pranë një kompleksi banimi, ka ndodhur një konflikt mes disa personave ende të paidentifikuar.
Sipas informacioneve paraprake të Policisë së Tiranës, konflikti dyshohet se ka ndodhur me përdorimin e sendeve të forta. Si pasojë e përplasjes, është dëmtuar një i ri, shtetasi K. F., rreth 19 vjeç, i cili është transportuar me urgjencë në spital dhe ndodhet nën kujdesin e mjekëve.
Grupi hetimor ndodhet në vendngjarje dhe po punon intensivisht për zbardhjen e plotë të rrethanave të konfliktit, si dhe për identifikimin dhe kapjen e personave të përfshirë.
Zbulim i Ri: I Lënduari Është Djali i Ish-Deputetit Mhill Fufi
Në zhvillimet më të fundit, është bërë e ditur se 19-vjeçari i dhunuar është Kristi Fufi, djali i ish-deputetit të Partisë Demokratike, Mhill Fufi. Ngjarja ka ndodhur në një nga rezidencat luksoze të zonës së Lundrës, ku mendohet se ka nisur konflikti që përfundoi me dëmtimin e tij.
Policia e Tiranës ka nisur hetimet për të përcaktuar shkakun dhe dinamikën e saktë të përplasjes, ndërsa pista kryesore mbetet një përplasje për motive ende të paqarta.