Mijëra forca sigurie, avionë, anije dhe teknologji anti-dronë janë angazhuar për të garantuar mbarëvajtjen e funeralit të Papa Françeskut në Vatikan, ku janë mbledhur liderët kryesorë botërorë dhe mijëra pelegrinë.
Në një ceremoni historike, Presidenti i SHBA-së Donald Trump, Presidenti i Ukrainës Volodymyr Zelensky, Kryeministri britanik Keir Starmer, Presidenti francez Emmanuel Macron dhe Princi William janë ndër personalitetet e larta që marrin pjesë në nderimet e fundit për Atin e Shenjtë.
Masat e sigurisë janë ekstreme dhe përfshijnë:
- 8,000 forca sigurie, ndër to xhandarë të Vatikanit dhe oficerë civilë;
- Bazuka anti-dronë dhe snajperë të pozicionuar në çatitë përreth Sheshit të Shën Pjetrit;
- Avionë AWACS të NATO-s për mbikëqyrjen e hapësirës ajrore;
- Njësi ushtarake speciale italiane dhe anije luftarake për të mbrojtur brigjet përreth.
Sipas protokollit të Vatikanit, vendosja e liderëve është organizuar në rend alfabetik në frëngjisht. Donald Trump do të ulet në rreshtin e tretë, ndërsa përballë tij, në rreshtin e dytë, do të qëndrojnë mbretër dhe princër evropianë, si Princi William.
Ky është takimi i parë midis Trump dhe Zelensky pas përplasjes së tyre të famshme në Zyrën Ovale.
Ndërkohë, trupi i Papa Françeskut, i cili ndërroi jetë pas një hemorragjie cerebrale në moshën 88-vjeçare, do të varroset në Bazilikën Santa Maria Maggiore, duke thyer traditën e varrimit në shpellat e Vatikanit.
Operacioni i sigurisë përshkruhet si një nga më të mëdhenjtë e organizuar ndonjëherë në Romë, për shkak të pranisë së mbi 130 delegacioneve të huaja, 50 krerëve të shteteve dhe 10 monarkëve.
.