Takimi i zhvilluar të enjten midis Xhorxho Furlanit dhe Igli Tares u konsiderua pozitiv, një ndjesi që është konfirmuar sërish edhe në orët e fundit nga burime pranë të dyja palëve. Administratori i Milanit dhe ish-drejtori shqiptar kanë thelluar njohjen reciproke, duke diskutuar në detaje për rolin dhe përgjegjësitë që do të ketë drejtori i ri sportiv në klubin kuqezi.
Sipas raportimeve të “Tuttosport”, të dyja palët synojnë të arrijnë një marrëveshje sa më shpejt, me fillimin e muajit maj që shihet si një afat përfundimtar për arritjen e akordit. Igli Tare vazhdon të mbetet kandidati favorit për këtë pozicion strategjik, për një sërë arsyesh që e bëjnë atë zgjedhjen më të natyrshme.
Megjithatë, drejtuesit e Milanit janë të vendosur të mos bëjnë gabime. Procesi i përzgjedhjes kërkon konsensus të plotë dhe unanimitet mes të gjithë faktorëve vendimmarrës në klub, qoftë nëse përfundimisht zgjedhin Taren apo një kandidat tjetër.
Vendimi përfundimtar pritet të merret në ditët në vijim, ndërsa Milani mbetet i fokusuar të ndërtojë një projekt të qëndrueshëm dhe ambicioz për të ardhmen.