Një shpërthim i fuqishëm tronditi portin Shahid Rajai në qytetin Bandar Abbas në jug të Iranit, duke shkaktuar të paktën 8 viktima dhe rreth 750 të plagosur.
Sipas autoriteteve vendase, shpërthimi ndodhi në një moment kritik, ndërsa Irani kishte nisur raundin e tretë të bisedimeve me Shtetet e Bashkuara në Oman mbi çështjen e programit të tij bërthamor. Megjithëse shkaku zyrtar i incidentit nuk është konfirmuar ende, burime lokale dyshojnë se shpërthimi mund të jetë shkaktuar nga materiale kimike të depozituara në port.
“Shkaku i këtij incidenti ishte shpërthimi i disa kontejnerëve në portin Shahid Rajai. Aktualisht po analizojmë situatën dhe po transportojmë të plagosurit në qendrat mjekësore,” deklaroi një zyrtar për menaxhimin e krizave për televizionin shtetëror iranian.
Ngjarja e rëndë ka shtuar shqetësimet në një kohë tensioni diplomatik dhe ekonomik për Iranin, ndërkohë që autoritetet lokale dhe ekipet e emergjencës janë në gatishmëri për menaxhimin e pasojave.
Hetimet për përcaktimin e saktë të shkaqeve të shpërthimit janë në vijim.