Një pengmarrje e planifikuar për të shlyer një borxh ndaj një institucioni financiar është zbardhur nga Prokuroria e Tiranës, duke çuar në arrestimin e 6 personave, mes tyre dy vëllezër, një grua dhe tre bashkëpunëtorë.
Sulejman dhe Klinton Sina, së bashku me Idajet Mashollarin, Bajram Ibraliun dhe Nikoleta Begollin, morën me forcë 68-vjeçarin Edvar Agalliu në rrugën “George W. Bush” dhe e dërguan në një banesë të braktisur në fshatin Kakunjë, ku e mbajtën peng duke i kërkuar bashkëshortes së tij 20 milionë lekë të vjetra për lirimin.
Sipas Prokurorisë dhe provave filmike, pas rrëmbimit, autorët telefonuan bashkëshorten e pengut duke e kërcënuar për jetën e tij. E frikësuar, ajo i dorëzoi shumën në zonën e Saukut, pa e denoncuar menjëherë ngjarjen, gjë që ngriti dyshime për presionin psikologjik të ushtruar ndaj saj.
Sulejman Sina, i cili ka pranuar përgjegjësinë, kishte në automjetin e tij 17 milionë lekë të vjetra, ndërkohë që 3 milionët e tjera nuk u gjetën – pasi dyshohet se janë përdorur nga autorët për të shlyer kreditë e tyre te “IuteCredit”.
Gjyqtarja Oleda Lice caktoi arrest me burg për të gjithë të përfshirët, ndërsa aktakuza për pengmarrje me qëllim përfitimi financiar parashikon dënim deri në 20 vite burgim.
Ngjarja zbulon një spiralë kriminale të ushqyer nga borxhi dhe presioni financiar, ku përfitimi i shpejtë kthehet në një akt të rëndë penal që mund të ndryshojë fatin e gjithë jetës.